როდესაც  ელექტრონული მუსიკით დავინტერესდი კლუბები და მითუმეტეს ფესტივალები არ იყო. ინტერნეტიც არ გვქონდა, რადიოთი 12 საათის შემდეგ ვისმენდი ელექტრონულ მუსიკას. ახლა ვხვდები პროგრესივი და ტრანსი იყო, მაშინ სახელიც არ ვიცოდი. 2000-იანებში ინტერნეტის გამოჩენასთან ერთად ყველაფერი უფრო ხელშესახები გახდა. დავიწყე არტისტების, ჟანრების მოძიება და მერე ჩემსავით დაინტერესებული ადამიანების ჯგუფი აღმოვაჩინე. ერთ-ერთს სიდიჯეი ორასი  გამოუგზავნეს, მასზე ექსპერიმენტებით ვისწავლე დაკვრა. პატარა ჯგუფად ჩამოვყალიბდით, არტისტებს ვუკავშირდებოდით და ჩამოგვყავდა. ისეთი დრო იყო კომპიუტერი ყველას არ გვქონდა, ინტერნეტ კაფეში დავდიოდით, სიდი დისკზე მუსიკის გადმოსაწერად. 18 წელი გავიდა ამ ამბის შემდეგ და ინდუსტრია მთლიანად შეიცვალა. არამხოლოდ ტექნიკური კუთხით, ადამიანების ქცევაც განსხვავებულია,  მაშინ ვინმესთვის მხარი რომ გაგეკრა შეიძლება დანაც დაერტყათ. მერე როგორც ხდება, სამსახურზე გადავერთე. პარალელურად სულ ვცდილობდი მუსიკასთან კავშირი არ გამეწყვიტა, ხანდახან ვუკრავდი კიდეც. თუმცა მაინც ძალიან ჩამოვშორდი ამ სფეროს. 

სამი წლის წინ ჩემმა ბავშვობის  მეგობარმა, გიორგი ღვალაძემ, ვიდეოგრაფია, იცოდა ჩემი მუსიკისადმი დამოკიდებულება, შემომთავაზე იდეა -  გავაკეთოთ პროექტი და საქართველოს სხვა და სხვა ადგილებში ჩავწეროთ ვიდეო სეტებიო. ასე შეიქმნა სანსეტი. გამოვიყენებ ამ პლათფორმას და მადლობას გადავუხდი სპონსორებს, ნამდვილად ძალიან მნიშვნელოვანი როლი აქვთ. რაც შეეხება უშუალოდ ვიდეოების ჩაწერის პროცესს - ჯერ მივდივართ ადგილის დასათვალიერებლად, ვცდილობთ უცხო ადგილები ვნახოთ და ამასთან აპარატურის ასატან გეგმასაც ვსახავთ. ხშირად ცხენით, ან ფეხით გვიწევს დანიშნულების წერტილადმდე მისვლა.

მეგობრების დახმარების გარეშე ეს პროექტი წარმოუდგენლად რთული იქნებოდა. წამყვან ლეიბლებთან ვთანამშრომლობთ, გვიგზავნიან პრომოებს, ხშირად ვუკრავ ისეთ ტრეკებს რომელიც ჯერ გამოსული არ არის. საქართველოშიც ნელ-ნელა გავზარდეთ ცნობადობა. ამ ეტაპზე ჩვენი მიზანია პროგრესივ ჰაუსის პოპულარიზაცია, სამომავლოდ გვინდა უცხოელი არტისტების ჩამოყვანა სანსეტის იდეის ფარგლებში.

გაცვეთილი ფრაზაა, მაგრამ 35 წლის ასაკში მეორედ დავიბადე, დავიწყე და დავუბრუნდი იმას რაც მიყვარს. რას ვიფიქრებდი 303 Hz-ში თუ დავიწყებდი სწავლას, ავსქროლავდი და ჩამოვსქროლავდი მაგრამ ვერ ვიღებდი საბოლოო გადაწყვეტილებას, დროის ფაქტორს და დიდ ხნიან პაუზას ვიმიზეზებდი. ახლა ერთ-ერთი სწორი გადაწყვეტილებაა, ამას მთელი გულით ვამბობ ჩემს მეგობრებთანაც.

იმის გარდა, რომ Ableton ვისწავლე და სწავლის პროცესში ვარ,  აქ მოსვლის წამიდან დავძლიე შიში. იმ სახლურმა და მეგობრულმა გარემომ რაც დამხვდა, კობერამ რომელიც, გარდა იმისა რომ კარგად გადმოსცემს, ისე არ გაგიშვებს რომ არ გაიგო, გაადვილა ჩემი სწავლის პროცესი. 

მაქსიმალურად მინდა რომ ჩემი ცხოვრება Music Production-ს დავუკავშირო, შენ დაწერილ მუსიკას რომ უკრავ ამაზე დიდი სიამოვნება არ წარმომიდგენია.  ეს დაგროვილი ცოდნა მაძლევბს იმის შესაძლებლობას მუსიკა დავწერო. ბევრი არტისტის მოსმენა გეხმარება ინტერესების ჩამოყალიბებაში, დიდი არჩევანი გაქვს. ჩემი მიზანია, რომ Music Production-ით მიცნობდეს ხალხი, რადგან ჩემს ცხოვრებაში, ნამდვილად ახალი ეტაპი დაიწყო.